မေးစေ့မွေး

သိတဲ့အတိုင်းပဲ ကျုပ်တို့ယောက်ျားတွေဆိုတာ ရေမိုးချိုးပြီး အင်္ကျီဘောင်းဘီလေးကောက်စွပ်လိုက်ရင် ပြီးပြီ။

မသကာ ရေမွှေးစွတ်တာပဲရှိတာပ မိန်းမတွေလိုမျိုး "ဒါလေးနဲ့ ပိုလိုက်မလား၊ ဒါလေးက ပိုလှတယ်" ဆိုပြီး ဝတ်စုံရွေးစရာလဲ မလိုဘူးလေ၊ အဝတ်တန်းမှာ မလျှော်ဘဲ လှန်းထားတာရှိလား ကြည့်တယ်။ မရှိဘူး။

အိုခေပေါ့ ဗီရိုထဲက အပေါ်ဆုံးတစ်ထည်ကို ကောက်ဆွဲပြီးဝတ်လိုက်တယ်။

"ဟယ် ဘောင်းဘီတိုလေး"

ဟုတ်ပ ဘောင်းဘီတိုလေးတွေ တောင် မဝတ်ရတာကြာပေါ့၊ ဇစ်ဆွဲတင်ကြည့်တယ်၊ ရသေးတယ်။

ဘောင်းဘီချိတ်ချိတ်ဖို့ဆွဲတော့ ဗိုက်ကတစ်နေပြီ။

"အို မရ ရအောင် ဝတ်အုံးမှာ "

ရင်ဘတ်ကြီးမို့နေအောင် ရှူးခနဲ လေရှူသွင်းပြီး ထပ်တပ်ကြည့်တယ်။

"ဟယ် ရသွားပြီ"

ဟုတ်တယ်၊ ရသွားပြီ။

ဒါပေမဲ့ အဲ့သည်အတိုင်း ရင်ဘတ်ကို မို့ထားရတယ်။

ဖင်ကို ဟန်ပါပါအနောက်ပစ်ထားရတယ်။

လေရှူသွင်းထားရတာကိုး။

မြို့ထဲကို အဲ့သည်ပုံစံအတိုင်း ရင်မို့မို့  ဖင်ကောက်ကောက်နဲ့ပဲ သွားရတာပေါ့။

ငတိမနဲ့ချိန်းထားတဲ့နေရာရောက်တော့ ဒင်းမရောက်သေးဘူး။

အဲ့သည်နေရာနားမှာ ထိုင်နေတဲ့လူတွေလဲ ရှိပါရဲ့။

ထိုင်စရာနေရာလေးတွေလဲ လွတ်သေးတာပ။

ဒါပေမဲ့ သိတဲ့အတိုင်းပဲ။

ကိုယ်တွေဘဝက ထိုင်တာနဲ့အရှက်ကို ဇစ်ပါဟက်တက်ကွဲမှာကိုး။

သိပ်မကြာဘူး ရောက်လာပါတယ်။

တွေ့တွေ့ချင်း ကျုပ်ကိုလက်ညှိုးထိုးပြီး အလန့်တကြားနဲ့။

"ဟယ် … ရင် ရင်ဘတ်ကြီး"

"အင်း လေရှူသွင်းထားတာ"

"ဟယ် ဟိုမှာလဲ ဖင်"

"အင်းလေ အဲ့ဒါဖင်လေ"

"ဟာ ဘောင်းဘီတို … တောက်ဘောင်းဘီတို ဝတ်လာတယ်ပေါ့လေ"

"အင်းပေါ့လေ … နုသွားတယ်ဟုတ်"

"ချွတ်စမ်း …"

"ဟယ်"

"နင် ဒါသက်သက် ငါ့ကိုမလေးစားတာ"

"ဘာ ဘာဆိုင် …"

"ဘောင်းဘီတိုဝတ်လာတာကိုက နင်ငါ့ကိုမလေးစားတာ၊ ငါ့အချစ်တွေကို စော်ကားတာ၊ ငါ့သိက္ခာကို ချိုးချပစ်လိုက်တာပဲ"

"ဟင်  သြော်"

"ဖြစ်သလိုဝတ်ပြီး လာတွေ့တာ"

အောင်မာ … အရင်တုန်းက ဝတ်စုံ တစ်စုံကို သုံးရက်လောက်ထပ်ထပ်ဝတ်နေတုန်းက အကောင်း။

အခု သူမကြိုက်တဲ့ဘောင်းဘီတို ဝတ်လာတော့မှ။

"တကယ်တော့ ငါနင့်အတွက်ပြောတာပါဟာ"

ငတိမ ပြောနေရင်းနဲ့ ငိုသံဝဲကြီးပါစွက်လာတယ်။

"ဟယ် လူကြားထဲငိုနေပြီလားမသိဘူး  ဒုက္ခပဲ"

မျက်ရည်သုတ်ပေးဖို့ ကြည့်လိုက်တော့ "သြော် မျက်ရည်လဲမထွက်ပါလား"

"အခု နင့်ပုံကိုကြည့်စမ်း"

"ကြည့်တယ်လေ ဘာဖြစ်နေလို့တုန်း"

"ဘဝပျက်မယ့်ပုံ"

"ဂစ်"

"ဖင်ကကောက် ရင်ကမောက်၊ ဒီကြားထဲ ခြေသလုံးမွေးတွေက မြှူဆွယ်နေသေးတယ် ပီဘိအခြောက်"

"အု"

"နင် မြန်မာယောက်ျားလေးမဟုတ်ဖူးလား"

"ဟုတ်တယ်လေ"

"နောက်တစ်ခါလာတွေ့ရင် လုံချည်ပဲဝတ် ဘာဘောင်းဘီမှဝတ်မလာနဲ့ ကြားလား"

ကျုပ်ကို ဒီလိုလာအော်လို့ရရိုးလား ချက်ချင်း ပက်ခနဲပြန်အော်ပစ်လိုက်တယ်။

"ဟုတ်"

နောက်နေ့တွေသွားတွေ့ရင်  ကျုပ်မှာ လုံချည်ပဲဝတ်ရတော့တာပေါ့။

ဒါတောင် ဒင်းက တွေ့တွေ့ချင်း စစ်လားဆေးလား လုပ်သေးတာ။

"ဘောင်းဘီခံ ဝတ်လာသေးလား"

"ဟင့်အင်း မဝတ်လာပါဘူး"

လူတွေကလဲ လှည့်ကြည့်ကုန်တာပေါ့။

"အထဲမှာ ဘာဘောင်းဘီမှမပါတာ သေချာတယ်နော်"

"အင်းဆို … အတွင်းပလိန်း"

"နံရံဘက်လှည့်လိုက်"

"ဟင် သြော်"

ကျုပ်တစ်ကိုယ်လုံးကို (အထူးသဖြင့် အောက်ပိုင်းပေါ့) ရဲတွေ လက်နက်ရှာသလိုကို စစ်တာ။

"လက်မြှောက်ထားလေ"

"သြော် အေး အေးပါ"

စိတ်ကြိုက်စစ်ပြီးလို့ အထဲမှာဖင်နှစ်တုံးကလွဲပြီး ဘာမှမပါမှန်းသိတော့မှ လွှတ်ပေးတော့တယ်။

တစ်ခါကလဲ သူ့ကိုမင်းသားတစ်ယောက်ရဲ့ပုံပြဖူးတယ်။

မင်းသားက Jason Statham ကတုံးပြောင်မှာ မုတ်ဆိတ်နုတ်ခမ်းမွေး ခပ်ရေးရေးနဲ့ လွှတ်ကြည့်ကောင်းတဲ့မင်းသားပေါ့။

"သူ့သိလား"

"ရှာရွတ်ခန်မလား"

"ညှင်"

"မကြိုက်ဘူး အမွေးတွေအမှင်တွေနဲ့"

"ကုလားမင်းသားမဟုတ်ပါဘူးဟာ။  အင်္ဂလိပ်မင်းသားပါ ဒီလောက်ကြည့်ကောင်းတာကို"

"မကြိုက်ဘူး။ နင်အဲ့လို မေးစိမွေးတွေ ထားရဲထားကြည့်"

"ဟယ်  သြော်"

မုတ်ဆိတ်မွေးကို မေးစေ့မွေးတဲ့။ ကျုပ်ကလဲ ဘာဆိုဘာအမွေးမှမပေါက်တာ။ ဟိုလူ့မေး ဒီလူ့မေးနဲ့ စုံစမ်းကြည့်တော့ အမွေးပေါက်ဆေးရှိတယ်တဲ့။

ပျော်သွားတာပေါ့ဗျာ … ဈေးကလဲသင့်တာကိုး… ပုလင်းလိုက်ဝယ်ပြီး မျက်နှာတစ်ခုလုံးကို သနပ်ခါးလူးသလိုကို ပွတ်တော့တာ။

"အို မလိုတဲ့နေရာ နောက်မှပြန်ရိတ်မယ်"

တစ်ပတ်လောက်ကြာတော့ မေးစေ့မှာ သုံးလေးပင်ထွက်လာကော။

"ဟယ်  မေး … မေးစေ့မွေးထွက်လာပြီ၊ ဘာ … ဘာလုပ်ရင်ကောင်းမလဲ၊ ရေများများလောင်းပေးရမလားမသိဘူး။

အို နေပူထဲ ပက်လက်သွားအိပ်နေလိုက်မယ် ဒါမှ နေရောင်ခြည်ကနေ အစာချက်တယ်ဆိုလား အဲ့ဒါဖြစ်မှာ ဟုတ်ပြီ"

အိမ်ထဲနေတာတောင် နေပူတဲ့နေရာတွေရွေးရွေးပြီးခွေရတာ မေးစေ့မွေးလေးတွေ မြန်မြန်ရှည်အောင်လို့လေ။

ကျုပ်အဲ့သလို ပိုးမွေးသလိုမွေးထားတဲ့ မေးစေ့မွေးလေးတွေကို ဟိုအဖျက်မ ဘာပြောတယ်မှတ်လဲ။

"နင် ဟိုပုံထဲက အမီတာဘဂျမ်းလို လိုက်ထားနေတာမလား"

"ဟင် … Jason Statham ပါဟယ်"

"ဘာဖြစ်ဖြစ် အဲ့ကုလားမင်းသားပုံ လိုက်မထားရဘူး"

"အုမ်"

"ဒါ ငါ့စကားကို အရာမသွင်းတာ၊ ငါ့ကိုမလေးစားတာ၊ ငါ့အချစ်ကို စော်ကားတာ၊ ငါ့သိက္ခာကိုရိုက်ချိုးတာ"

"ဒီအမွေးလေး သုံးပင်ထားတာကလေ"

"ဟုတ်တယ်"

"သြော်"

မျက်ရည်တောင် ဝဲတယ်။

"အဲ့သည် မေးစေ့မွေးတွေမရိတ်သရွေ့ ငါနင်နဲ့ မပတ်သက်ဘူး"

"ဟယ်"

တကယ်ကြီးဗျာ … တကယ်ကြီးကို အဆက်အသွယ်ဖြတ်ပစ်လိုက်တာ၊ နောက်ဆုံးတော့ ကျုပ်သိပ်ချစ်သိပ်တန်ဖိုးထားရတဲ့ မေးစေ့မွေးလေး သုံးပင်ကို ကျုပ်လက်နဲ့ကျုပ်ကိုယ်တိုင် ရက်ရက် စက်စက် နုတ်ပစ်လိုက်ရတော့တယ်။

အဲ့သည်နေ့ကဆို ထမင်းတောင် မစားနိုင်ဘူး။

မေးစေ့မွေးလေးတွေကို အိမ်နောက်က မြေကွက်လပ်မှာ သေသေချာချာလေးမြှုပ်လိုက်ပါတယ်။

"သြော် သတ္တဝါတစ်ခု ကံတစ်ခုပေါ့လေ။ နောင်ဘဝဆိုတာများရှိခဲ့ရင် ငါ့မေးစေ့မှာ မင်းတို့သုံးယောက်စလုံး ထပ်ပြီး ပေါက်ဖွားကြပါစေ သူငယ်ချင်းတို့ရာ။ ဟယ်နေပါအုံး သူငယ်ချင်းမှ မဟုတ်တာ ညီလေးတို့ရာ …အယ် ဒါလဲမဟုတ်သေးဘူးအမျှင်လေးတို့ရာ …"

ကျုပ်ရင်ထဲ တကယ်မကောင်းတာ။

ကျုပ်မှာ မေးစေ့ကတုံးကြီး ဓာတ်ပုံရိုက်ပြီးပို့တော့မှ ဟိုငတိမ စကားပြန်ပြောတယ်။

"ဖိုတိုရှော့မဟုတ်ပါဘူးနော်"

"တကယ် သေသွားကြပါပြီဟာ"

"ဟမ်"

"ငါ နုတ် … နုတ်ပစ်လိုက်ရပြီလို့ပြောတာ"

"သြော် ဒါဆို နက်ဖြန်လာတွေ့ချင်တွေ့လေ"

ဝယ်ထားသမျှ အမွေးပေါက်ဆေးတွေလဲ လူးစရာမရှိတော့ ခြေသလုံးမှာ ပွတ်လိုပွတ် (အခုတောင် ခြေသလုံးမွေး တော်တော်ထူနေပြီ) ကျုပ်မှာ မေးစေ့မွေးလေးတွေ အမှတ်နဲ့ ခြေသလုံးမွေးတွေကို ယုယရတော့တာပေါ့။

ဘောင်းဘီတိုလဲမဝတ်တော့ သူလဲမမြင်ဘူး။

အခုတော့လဲ ခြေသလုံးကမေးစေ့မွေးလေးတွေနဲ့ ကျုပ်ဘဝနေသားကျနေပါပြီ။

သြော် … ဘာလိုလိုနဲ့ မေးစေ့မွေးလေး သုံးပင် ဒီနေ့ရက်တောင်လည်ပါပေါ့လား။    ။